不再寧靜

今日係告別寧靜的"大"日子。幸好尋晚並不枉過！

自己一個人住咗接近兩個月，終於要再次聚守一堂。我向來都知道自己鐘意"獨家村"，自己做自己嘢，最怕teamwork，所以做律師幾啱我，自己寫自己嘅advice同見解，然後俾partner approve就得。今日不再獨自過夜晚反而唔習慣，再次聽到媽媽嘅嘮叨，老豆嘅咳聲，原來我怕嘈嘅指數係咁高，可以令到我咁忟憎，唉...仲報咗四科conversion exams添，雖然考四科係一個great challenge，但係點樣可以再喺嘈吵嘅環境專心温書先係我最大嘅challenge。

七月十四

今日係農曆七月十四，咁啱今日陪媽媽返醫院睇醫生，醫生開會決定點醫媽媽。

今朝六點幾就起身做家務，再會合飲完茶嘅媽媽同哥哥，一齊去QE等結果。結果可以總括為: 不幸之中嘅大幸。好嘅係：癌細胞無擴散，唔好嘅係：媽媽以後嘅生活會增添好多不便，媽媽好難接受呢個手術，但係呢個係唯一可以醫嘅方法，唔做的話就即係等擴散，等死。

媽媽咁啱返屋企途中遇到個舊街坊，呢位街坊我好想拉佢出去打，居然同媽媽講啲咁嘅說話，攪到媽媽發癲話想死，我媽媽份人真係做得出架，哥哥話如果媽媽真係出事，會揾呢位白痴師奶墊屍底。哥哥話我聽成件事，攪到我擔心到喺公司喊咗出嚟。師奶，你無腦唔緊要，唔該收聲好無，唔講嘢無人話你啞架。

原來好多嘢真係有安排，呢個時候居然出現咗姑姐姑丈，佢哋無喇喇嚟幫一位街坊俾帖媽媽，姑姐姑丈係好positive嘅人，開解咗媽媽好多，勁鍾意佢哋...我放心咗好多。

希望媽媽積極啲面對呢個病同可以適應到咁大嘅轉變，成家人都支持你架！

煩

如果一至日當一個星期，上星期就已經有兩晚瞓唔著，身體極度疲累，但係個腦就不停係咁轉。雖然尋晚揾完daisy，但係無補於是，最後接近凌晨三點，決定坐電椅三十分鐘，坐完之後又真係瞓得著，好彩...兩萬幾蚊張椅，雖然貴，但係真係有不時之需嘅。

尋日被家姐話完我請工人一事唔上心，今日即係lunch去咗agent度揾印傭，揀番"同鄉"，無難度。講真，揀工人真係好求其，好唔好只係講彩數，首先睇樣，正常就算；然後睇下工作經驗，講真個個差唔多；跟住睇試唔試廣東話，呢個時就會睇碟，個個講嘅嘢差唔多: agent問"點解想嚟香港?" 印傭答: "因為想賺多啲錢同經驗"，最尾加句"先生，太太，希望喺香港見"...個個練呢幾句，點分邊個識廣東話呢...其實請無所謂，但係我唔係好想同佢同房囉。

阿哥話唔需要請，搬屋緊要啲，家姐話請工人，全家少argue啲，搬屋完全唔重要...我就快精神分裂，我想話我唔係真係lawyer，我無幾皮野一個月，我份人工只可以support到做其中一樣嘢架咋。

俾揀咗嗰個印傭嘅resume媽媽睇，佢話佢唔想請....好似有啲口不對心....我真係唔知點嘞宜家，十個煩...唔胃痛都幾難啦！

又一壯舉

呢個星期，每日都7點起身，大概做45分鐘家務，先換衫化妝返工(好彩宜家唔使再打理個頭)，加上每日都好多嘢做，又要照顧兩個trainee，返到屋企，根本攰到唔想郁，尋日食完飯頂唔順要即刻瞓陣覺休息一陣。向來體弱嘅我，只係一個星期我已經胃痛發作同有少少頭暈，不過一定唔可以講出嚟，媽媽知道一定唔俾我再咁做，又會朝早煮飯要我帶，到時我仲勞氣。

尋日終於出咗final year嘅成績，今年係考得最好嘅一年，但其實對於入pcll嚟講，似乎機會好微。回想起考試期間，心情根本未好番，用咗一半腦同埋一半時間諗啲無謂嘢，宜家考成咁，其實真係好滿意。當時同ex講，可唔可以唔分手住，等我考完試先再算，因為final year成績好critical，分手的話我一定無心機讀書，當然呢個係一個好唔得嘅excuse，佢想分手仲點會理我考試考成點，所以最終都係分手。不過原來唔拍拖，無temptation出街，無責任陪男友，除咗用咗時間諗無謂嘢之外，其餘時間都係用嚟讀書，出嚟嘅效果都幾好。不過咁樣讀書法，我真係無咗半條人命。轉眼讀咗3年，旁觀者會覺得咁快又讀完一個學位，但係當中需要付出幾多努(腦)力，幾多心機，其實唔讀過，真係唔會知，半工讀llb，真係唔係咁簡單。

當然我都覺得呢3年過得好快:第一年同master year 2一齊讀，全年不停返學，做paper，考試，嗰年過得快到好似skip咗，宜家都仲好驚嘆自己當年嘅栢力；第二年感情出現好大變化，全副心機去咗嗰度，成績咁差但一啲都無唔開心，宜家當然後悔，因為成績同人都兩失；第三年應該喊咗大半年，過分透支，日日用kfc咖啡吊命，好辛苦先捱到考完試。宜家終於完成，雖然呢個學位一啲都唔容易攞，但係無乜特別感覺，始終都已經第三次大學畢業。

講真，我一路都好想多謝明太子喺我考試期間又或者喺我失戀期間對我嘅support，如果唔係考試期間日日都有人聽我sung辛苦，又明白我講嘅law，考commercial同我温contract(otherwise我未必考得咁好)，又指導我點樣可以exam-oriented多啲，又唔嫌我煩重複聽我講ex同ex ex嘅嘢(每次聽完你講嘅妙論我都會舒服好多，比Byrant勁十陪)，或者我真係會抑鬱，雖然老土，但真係好感謝你。

雖然llb難考，但從來無諗過原來fail係咁接近，因為每年上堂撞口撞面都係嗰啲同學，但今年聽到幾個fail嘅例子，但我完全明白唔係個人能力，或者勤唔勤力嘅問題，因為考llb需要配合嘅嘢太多：要中topic，要理解到題目，要寫字寫得快(聽聞tort要寫千幾字一條，我就衰在唔夠快，所以只係做咗3條半)，時間要控制得好，要熟讀案例同recent development...所以千祈唔好睇少london u llb嘅畢業生，同埋要好好對待身邊讀緊呢個program嘅人，因為佢哋太大壓力啦。

3月15號喺london u舉行嘅畢業禮，我當然唔會出席，本來喺香港攪嗰個都唔想去，不過如果媽媽想睇我行畢業禮同影相的話，我都會去嘅，或者到時拜託兩位龍友幫我哋影相。

Thank You!!

三家姐再問到一啲相關嘅資料。

雖則話如果唔擴散的話可以做手術，但係呢個手術係非常之危險，尤其是政府醫院手勢比較差，或者有機會偒及膀胱而需要掛袋。媽媽可能會覺得死唔可怕，但掛袋會好難受。而喺私家醫院做，當然會快啲同好啲，但因為媽媽個病涉及多科嘅醫生，手術費可能最少都要十幾廿萬。無得做手術即係話擴散，相等第三期以上，情況會好嚴重。家姐問過抗癌針其實真係好貴，有朋友腸癌喺私家醫，要廿幾萬一支針，由年頭開始已經用咗幾百萬，但未有好轉。雖則話老豆係一個強勁嘅後盾，但當然也不致於明皇上咁有錢，始終我哋都只不過係小康之家。不過現階段都未清楚情況，唯有等星期三scanning嘅結果，都係嗰句，希望情況唔好咁壞。

或者我真係做錯，但我咁做只係希望媽媽開心，等佢唔好咁擔心自己個病，或者真係難為咗你，你當我自私又好，唔顧及你感受，強迫你咁做又好，希望你能夠諒解我，因為我見到媽媽今日真係好開心，同時我對於你嘅"魅力"真係驚嘆不已。Anyway，多謝你嘅幫忙！

報告

要等佢哋聽完報告再轉告俾我聽，真係好torture，因為真係好擔心。

3點半收到家姐嘅電話，confirmed係陰道癌，醫生話媽媽唔係復發，而係一個新症，但呢種cancer好少有。要睇吓究竟點醫，就要視乎cancer有無擴散，所以要即刻book下星期三做個入山窿嘅全身scanning，如果無擴散的話，就可以做手術，有的話，醫生要傾吓點樣醫，希望無擴散啦，咁會放心好多。下次覆診我會陪媽媽去，其實親耳聽到第一手消息，真係好驚。

細家姐同我一齊返屋企問候媽媽，媽媽表現得好冷靜，我哋不停氹佢，話好番就會同佢去泰國同日本旅行。我亦同老豆講晒媽媽嘅情況，同佢講可能要用好多錢去醫病。食飯嗰時，我爆咗句"好彩我哋有個強勁嘅後盾"，老豆即刻講"呢個係做老公嘅責任，幾多錢都要醫，無問題"...嘩，頓時覺得老豆好man，我同家姐即刻大拍手掌，場面好好笑。

食飯嗰時又講起請工人嘅問題，初頭媽媽表演得好抗拒，我哋同佢講已經攪緊手續(對付媽媽嘅最佳方法係先斬後奏)，再講吓有個工人使有幾威，佢即刻好似好受落咁。請工人對成家都有好處，只係我要慳啲使，因為我要負責佢嘅人工。

安排

細家姐提議請工人，有人做家務之餘，又可以隨時照顧到媽媽，我都好同意。但係細哥同三家姐反對，認為無咁嘅需要，反而佢哋認為要避四哥，可能我哋要租屋搬走，以勉到時佢老婆生仔，大女喺香港讀書，夾硬霸咗屋企，影響媽媽養病。講真到時一定大把交嗌，唔走肯定好麻煩，宜家諗定後路都啱嘅。

為咗慳啲時間，做咗我唔係咁鍾意嘅負離子，同埋再剪短頭髮，朝早要做家務，如果仲花時間夾頭髮，五點起身都唔掂。

聽日出報告，好驚，三家姐仲話如果醫生覺得唔醫，病人無咁辛苦的話就慘嘞，攪到我更加擔心，不過病情如何已成定局，唯有接受同面對。

等待

突然知道星期五就出報告，好驚，一方面咁快睇報告即係應該好嚴重，政府嘅嘢好少咁快，另一方面，越早出報告就可以越早醫，其實係好事。總之唔好諗咁多，最緊要有得醫。

屋企人又嘈，我知道大家都唔開心，但係嘈交，話邊個啱定錯，根本無意思，都係嗰句，宜家全家人只係應該得一個目標，其他私人恩怨，個人情緒問題，唔該擺埋一邊，黑口黑面，媽媽見到都擔心啦，自己病埋仲衰，佢做化療身體咁弱，傳染埋啲病菌俾佢就慘嘞，到時又可以blame邊個呢...

同細哥講咗，我會每朝做好家務先出門返工，放工返屋企煮晚飯，佢負責照顧媽媽，帶佢覆診睇病，煮早餐午飯俾佢...我唔知自己做唔做得嚟，不過都要頂硬上，屋企仲有個年紀仲大啲嘅老豆，佢身體都係麻麻，佢有事，一樣都麻煩，況且佢仲要負責媽媽醫病嘅支出...

我覺得我比其他屋企人好彩，我有好多好朋友，有事嘅時候總喺我身邊支持我，安慰我...多謝晒你哋!!

學做乖乖女

宜家盡量早啲放工返屋企，希望可以多啲陪吓媽媽，我知佢一向都鍾意我返屋企食飯，況且過多個幾星期，或者媽媽已經無力煮飯，宜家有機會食到媽媽煮嘅飯，要好好珍惜。

逢星期二家姐返屋企食飯，媽媽會特別操勞，因為佢一定會煲湯，仲會煑多啲餸，可能會企喺廚房幾個鐘。今晚居然煎咗一碟多春魚，又蒸咗一條桂花魚。一見到碟多春魚，我即刻同媽媽講；你唔准食，你食蒸魚啦。然後吩咐老豆同家姐快啲清咗碟多春魚。媽媽宜家有糖尿病，我唔可以俾佢食啲咁高膽固醇嘅食物，就算我從來都唔食多春魚，都食咗好多，等碟多春魚清咗為止，我唔咁做佢實忍唔到口，好在今次媽媽無發脾氣，乖乖咁食蒸魚。

家姐同我講，其實一路搭車一路諗起，返到屋企見到媽媽咁情況，覺得好難受，尤其是佢有情緒病，佢同姐夫已經晚晚都瞓唔著，我好明白，因為我同媽媽住，我見到佢咁，個心更加難受。

本來9月同媽媽，家姐同細哥去曼谷玩，宜家當然去唔成。家姐話化療需要大概4-6個月，如果進展順利，新年無論幾貴都好，都一定會同媽媽去旅行，我好期待呢個旅行。

媽媽一向擔心我嘅身體健康，我可以做嘅就係唔好病，身體要健康，令到佢少啲擔心。

媽媽養病期間，我已經決定提供伙食，希望食得人啦，我會盡量學架嘞。

hope

雖然化驗結果未出，但係醫生用肉眼都已經見到腫瘤，咁睇嚟似乎範圍都幾大，希望只係生得出，而唔係生得大。最worst嘅係原來以前電療過，唔可以再電，而且陰道係無得切取，惟有只可以做化療，化驗其實想知道係邊隻菌，對正下藥，只係希望唔係啲菌唔好太惡同埋過程唔好咁辛苦。

媽媽越大年紀就越似大細路，樣樣嘢都唔聽，我真係好mong，又想喊，但係全部都要忍住，我知佢估到自己有事，但係幾嚴重或者佢唔知。電療辛苦，我相信化療仲辛苦，希望佢唔好放棄任何治療嘅機會，我一定會同佢一齊渡過。

喺呢個時候，居然唔係兄弟姊妹同心，而係不和升級，夾喺中間，好辛苦，宜家應該係大家商量應該做啲乜，而唔係我唔會原諒邊個邊個，話邊個邊個攪事，學是非，呢個家庭好複雜，好唔開心，另一方面佢哋學識少，少見世面，人就會心胸狹窄，自私自利，好煩好煩...可唔可以唔好咁，我只係想媽媽無事。

好擔心

我好擔心...情況俾我想像中仲要差，雖然未作進一步診斷，但已經估到七八成。

事情發生之後總會後知後覺，點解佢話有唔妥都唔迫佢check一check，點解唔早啲同佢去旅行，點解唔陪佢多啲，點解唔對佢好啲，當可能會失去嘅時候先識驚好快會失去，人點解總係咁樣...

宜家考試成績已經唔再重要，ex更加唔重要，只係想媽媽可以身體健康，無病無痛。

唉....

呢個世界痴情嘅人多的是，我都只係幾個月，有人居然2年幾，結埋婚都放低唔到，仲要從來未開始過...打算呢世都唔會開心，最慘嘅係佢老婆，有一段咁唔開心嘅婚姻，老公對佢嘅只係責任，已經無愛，仲要成日掛住第二個，如果我係佢老婆，知道老公係咁，我真係可能接受唔到，我勸佢都係唔好再浪費老婆嘅青春，等佢仲後生，揾過第二次愛佢嘅人把啦。

自己又係唔爭氣，成日掛住佢...不過已經好有進步，慢慢嚟啦....

自欺欺人

跟ex ex分手，原來已經一年，呢一年發生咗好多事，由理直氣壯咁認為佢與我不配，令自己理所當然跟ex一齊 (其實當時ex都無話同我一齊，但係我想令自己available for him)，到同ex真係一齊，到跟ex分手，然後到家姐不停替ex ex講好說話，再次聯絡ex ex，到知道佢原來已有新女友，到考試前發顛，sent咗幾個nonsense嘅sms俾ex ex，到同佢解釋，到考完試，到漸漸回復正常，到發現原來應該好多人都知....簡直發咗場夢咁。

我明白發顛原因大部份係因為ex，亦有一部份關於考試嘅壓力。如果從來唔同ex混熟，所有事都唔會發生，而且我舊年嘅成績都唔會咁差。但係同ex真係開心過，佢令到我因為經歷所發生嘅事而變得大個咗好多，慢慢從温室走出來，明白世事嘅殘酷，其實係咪得多過失呢?

明太子講得啱，如果ex真係主動揾番我，我又點會唔會同佢一齊呀，自欺欺人係女仔強項，發白日夢一樣都係女仔嘅強項，不過好多時諗嚟都多餘。不過有時都會反問自己，究竟佢有乜吸引力，令到我咁死心塌地，我相信明太子見到佢，更加唔明我點解會咁顛，起碼一定唔係佢杯茶，又矮，又瘦，又無毛，又斤斤計較，又小器，不過鍾意佢的話，有咩缺點都唔重要啦，況且自己缺點咪又係一大籮，佢的而且確有我欣賞嘅地方。

總之，呢個世界真係無秘密，除咗自己一個知嘅嘢外，總之有兩個人以上知嘅事，應該可以當呢樣嘢唔係秘密。唯有再次自欺欺人，自己認為無人知，又唔知道有其他人知就算。

無謂的漣漪

你sms我，同事講得啱，我心中的確泛起漣漪...

手機震，一看，發現你sms我，第一個反應，好緊張，心跳加速，手震震攞起電話，原來你問我考試考成點。一心只係諗點答你，完全無諗過你點解會咁做，因為我從來無諗過你會主動跟我聯絡，我真係好開心，原來你心入面仲有我，仲關心我。但係當你問完我呢樣嘢之後，就消失咗，我覺得好奇怪。

連日嚟不停咁諗點解你會只係問我考試考成點，究竟你個intention係乜嘢？我當然想你真正咁關心我，想示好，想同我重新開始...我真係會諗如果你真係想同我一齊嘅話，我應該點呢 (我知我應該諗多咗...但我真係好想呢個係事實，雖然以我認識嘅你一定唔會咁做)...不過我相信我會拒絕，我唔想俾你傷害第二次，況且我明白無論如何我哋都唔會夾。但係我慢慢再細心諗你問我考試考成點嘅原因嘅時候，就覺得其實你只係擔心你同我分手令到我無心機讀書，考試考得差。如果你想個心安樂而關心我的話，呢個行為好自私，我會好憎你。唔通我會同你講點解我讀得咁慢咁辛苦係因為我讀書嘅時候成日諗起你，我要用雙倍..甚至多幾倍嘅努/腦力去強記我真正應該記嘅嘢咩？話你知我當中喊咗幾多次？話你知我點樣傷害自己？話你知我有幾顛？然後再話你知因為我考試太exhausted，到宜家身體仲未recover咩？

以我認識嘅你，呢個可能性好大，你絕對唔想背負呢啲責任，唔想自己唔安樂...你當我小人都好啦...我覺得你係咁樣嘅一個人，正如你覺得我揾你個好友問你嘅roster一樣。

我後悔覆咗你，因為你知道我無論如何都會畢到業。我相信當八月尾出成績嘅時候你會再sms我，我諗我今次唔會再答你。

我本來已經開始慢慢咁放低緊，你唔好中途攪破壞啦，我真係會好辛苦架，麻煩你真真正正咁脫離我，我諗我唔須要你嗰少少嘅"關心"...pleas.....se!!!

信

曾幾何時，見到飛機，見到國泰新聞或者logo，見到黑色車，見到volkwagon，真係好驚，心跳會加速。宜家，情況已有改善，但係心裡總有點不舒服。

頭先睇"烈火紅心III"，聽到王喜留俾胡杏兒嘅voice message，令到我諗番起之前嘅嘢。嗰段大致係講"點解你唔聽我電話，係咪真係覺得我好煩，係咪覺得真係一定要分手，其實我真係好愛你，我所做嘅嘢都係想你幸福同開心，你講過要尊重每個人嘅決定，如果你真係決定要分手，我會尊重，同你分手，但係我個心真係好痛，我真係好想喺分手之前，再聽到你把聲。"全部都係我嘅心聲...

明太子話要識分假話，追你時候講嘅嘢唔可信。喺末同ex拍拖之前，阿哥已經warn過我每個人做每樣嘢都有目的，但我選擇沈醉喺ex嘅闗心同甜言之中。其實我唔係對所有人嘅關心同甜言都會受落，只係因為我真係鍾意嗰個人，先會信。不過，我知我弱點真係太容易信人，除咗ex ex提醒過我之外，連今日撞番補習學生嘅媽咪都叫我大眼識人。唉...

剪頭髮

留咗十年嘅長髮，終於剪了。換上新髮型，真係覺得輕鬆咗少少，感覺精神咗。

男性友人總覺得女仔剪短頭髮，一定係受咗乜嘢刺激。但係我從來都無咁樣諗過，只係見到自己一把好乾旱，已壞死嘅頭髮，覺得係時候要清理一下，更加上五年嘅曲髮，真係有啲悶，所以剪短頭髮，其實好理所當然。

好彩一致好評...哈哈

中醫

又睇了中醫，今次血壓又低咗少少，下壓53，上壓86。

其實自己都預計到血壓會再低，因為現在就算停低，都會有唔精神，少少暈嘅感覺。所以今次中醫開嘅藥，已經唔係醫個胃(雖然都仲會有胃痛)，而係補腦嘅藥，佢話食咗會"精神"啲，個腦營養會好啲。朋友話有啲血壓好低嘅朋友，試過喺沖涼嘅時候暈低，又或者行行吓街暈咗，我都擔心自己會有咁嘅一日，但願暈嘅時候有朋友在場，又或者唔好喺馬路度暈低。

我唔知點解身體會越來越差， 心情已經好咗少少，壓力又唔大，以前最大嘅壓力只係來自讀書，書都已經讀書，食嗰方面我從來都唔刻薄自己，會唔會有啲嘢我自己呃緊自己，形成咗啲無形壓力呢？

前幾日睇過一個中醫寫嘅專欄，佢話宜家啲人用咗"壓力"做檔箭牌，有乜事都賴咗有壓力而造成。佢話壓力係自己攞嚟，例如：如果考試前做足準備，考試何來有壓力。我覺得勁錯囉，考試雖則可以因為做足準備而減少咗好多無謂嘅擔心，但只要因為你太著緊個考試同埋成績，無論如何你點都會有壓力。好似讀law咁，有永遠做唔晒嘅preparation，讀晒所有要求讀嘅material，你仲可以睇最近判嘅cases，又可以睇journals，articles... 好啦，就算你睇咗好多嘢，你究竟了解到幾多，記得幾多呢，考試你又可以發揮到幾多，明白條問題問你啲乜呢... 根本就係個中醫太主觀，無乜嘢煩，又或者看透世事，無憂無求，先可以有咁嘅睇發。

anyway，到宜家我都真係預計唔到自己同law仲有無緣，有的話，仲可以讀多三年嘅，做埋lawyer。

為咗身體可以好啲，已定下計劃，每星期起碼做一次yoga同埋游一次水，我相信點都會有少少幫助啩。

胃病

報導話胃病同抑鬱病或者情緒病好有關係，究竟係有胃病先定係有情緒問題先，定係環環緊扣，兩樣都可以係各自嘅因果關係呢？

胃病包括胃痛、胃脹、消化不良、胃酸倒流，呢啲症狀我全部都有，仲已經持續咗幾年，一痛就痛幾個月，睇極醫生都唔好，惟有睇中醫。中醫又講到我就快死咁，佢話我血壓再低一啲就要入廠，但西醫嘅角度又話我唔係唔正常嘅低。總之一句講到尾，我身體差到極。

我知我胃病嘅原因係我太大壓力，太緊張，但考晒試之後仲胃痛，就知道係因為情緒問題，宜家日日都覺得唔開心，提唔起勁，個腦好似塞咗咁，我真係驚會變成真正嘅抑鬱，唔係講笑，真係驚架...

希望快啲到八月，因為我真係想散散心。

Be your own self

女主角十五歲已經明白自己嘅需要，莫講話十五歲，我到宜家都未必知道自己真正嘅需要。女主角明白知道需要不得止，仲可以唔介意人哋點睇，要做真正嘅自己。中國人嘅傳統思想未必做到，就算係外國人，都未必個個做得出。

就算明知自己鍾意啲乜，都會因為其他因素而影響自己嘅做法。人始終思想複雜，複雜到連自己有時都控制唔到，要真正了解自己真係談何容易。

發惡夢

我相信夢其實係可以反映生活嘅壓力同埋心態。

好耐無發惡夢，尋晚終於大駕光臨。發夢見到鬼，連唯一救到我嘅媽媽都俾隻鬼整暈埋，當隻鬼想偒害我嘅時候，嚇醒咗，醒咗依然覺得好驚。當我仲未瞓番嘅時候，手提突然響起，當時已經係零晨兩點幾，基本上唔會有人喺咁嘅鐘數打電話俾我，仲要有來電顯示，都未驚完，所以唔敢聽個電話。

到今朝嘗試打返去，發現呢個電話no.原來唔work嘅....仲驚....

我個夢其實正正反映咗我宜家好confused，亦知道除咗自己無人幫到我，一定要夠自己先可以跳出呢個困局。

晚晚瞓得唔好，仲要發惡夢，其實真係攰。

自尋煩惱

明知後果嚴重，都要繼續做，絶對係自尋煩惱。

當一個人覺得好辛苦嘅時候，的而且確好需要安慰；當一個人空虛嘅時候，的而且確好需要一啲真實嘅感覺。不論你身份如何，你是誰的朋友，只要我唔反感嘅，喺我有需要嘅時候出現，或者我都會做出相同嘅事。

但你...好複雜... 我知我應該控制自己，否則成件事會更加複雜。其實你也被蒙在鼓裡，如果你知道所有事，我相信你根本唔會咁做。

因為考試，因為失去您，令到我失去咗理智，失去咗自制能力，事情越弄越糟。

咁辛苦先捱過呢幾過月，為什麼還要自尋煩惱? 但係有啲嘢開咗個頭，根本唔識收科。不過，成件事如果我可以放低您的話，根本無嘢值得煩，問題係我幾時先可以放低您?

我知我要學識放低執著。

忘不了

我真係覺得自己好無用。

事隔半年，點解我都忘記唔到。我跟您所發生嘅事，每日都好似錄影帶般，喺我腦裡面重播。我仍然怪責自己點解做得唔好，點解唔要了解您多一點點。

我知道你並不是甚麼條件極好、性格好、對女友好嘅人，但就是喜歡您的所有，當然知道您嘅缺點，但人永遠都不會完美嘛，自己都一樣，有愛就能接受。

雖然我已經接受永遠不能再一齊嘅事實，但您永遠都會喺我心入面，因為所有發生過嘅事情，都是那麼刻骨銘心。要忘的，要記的，我真的控制不了。只能控制的，我以後都不敢再那麼投入，因為最終辛苦的，只是自己。

您知道嘛，到現在，每當我想起您，我都會好心痛，不禁會落淚...因為我真的好喜歡您。

發生了

最終，都發生了。

明知唔應該做，明知當呢件事俾某啲人知道，後果可能不堪設想，但事情發展至今，剛剛一個月的當天，最終都發生了。

究竟點解自己會咁做，或者我係咪想咁做，又或者我咁做係咪真係開心，我真係唔肯定，但係事情發展到呢個地步，己經唔可以返轉頭。最後件事會變成點，我會有乜嘢反應同感覺，或者可能十二月就會有分曉。

其實我一開始就唔認真對呢件事，所以就算結果係點 (其實都已經預計到結果會係點)，一啲都唔打緊。無謂花時間去諗去煩，活在當下，現在開心最緊要，想做便去做，反正都無乜顧慮，或者要顧慮的並唔係我。反而最重要嘅係，呢個秘密永遠只有我和他才知道便成了！

燃燒生命

終於一口氣用咗4年時間完成master同LLB，宜家都覺得自己原來有啲顛，用咗好多精力同心血，臨考試嗰段時間，真係每日由8點幾讀到夜晚兩點，日日要用咖啡吊命，同明太子日日講電話互相support，難怪佢話我似三十幾歲，如果我唔係做咁多facial，或者似四十幾歲都未定。

仲驚自己未死得，走去考conversion，終於捱到所有試都考完，但一啲興奮嘅心情都無，只係想身體好啲，個樣似番廿幾歲。呢幾年因為太辛苦，積出好多病：永遠唔好嘅胃痛、喉嚨敏感、耳水不平衡、頭痛、經常淋巴發炎，而且個腦轉得好慢，越來越無記性，總括嚟講，其實已經無咗半條人命，宜家要開始調理身體，或者四年都未好得番。

點解要咁辛苦？連我自己都唔係真係好明白，興趣係有，大學畢業已經想讀LLB，但係嗰時無錢讀，到有錢嘅時候反而走咗去讀master，讀master嘅時候又覺得唔讀LLB的話，個master無乜用，其實所有事真係有因有果，去到嗰個時候，自然會有咁嘅決定。我清楚自己係一個唔停得嘅人，唔想浪費時間，宜家我明白其實應該要有balanced life，我放咗太多精神喺讀書上面，生活一啲都唔balance，失去咗好多嘢，宜家後悔都無用。

成績未出，都predict唔到考成點，考得好就會繼續讀埋PCLL，考得唔好，就真係要好好考慮吓前途問題，宜家都係開開心心放完個暑假先算，八月尾就會有成績，到時自然會有決定。

《變型金剛狂派再起》

本來打算喺IMAX睇《變型金剛狂派再起》，以為早一兩日買飛，己經好穩陣，點知上網一check，只係得番最前一行。IMAX戲飛，最平都要85蚊一張，香港人當然唔係傻，一定認為套戲有番咁上下，先會肯買咁貴嘅戲飛。

願意付上85蚊，甚至乎95蚊，絕對唔係因為《變型金剛狂派再起》嘅戲情吸引，講真戲情簡單到不得了：大美國聯同機械人拯救地球，除咗《變型金剛》fans之外，我諗大部份人都會認為呢套戲嘅特技，喺IMAX睇，應該會更出色。(不過我慶幸我買唔到IMAX嘅戲飛而去咗普通戲院睇，因為睇完我都已經覺得好眼花，喺IMAX睇應該會更嚴重。)

我對港產片並唔係有特別bias，但係真係諗唔到有邊套港產片如果喺IMAX上的話會full。莫講話要俾85蚊去IMAX睇，要我俾60蚊入場睇港產片，真係無乜邊幾套。上一套喺戲院睇嘅港產片己經係上年嘅《保持電話》。

Be fair，唔好同荷里活大片比，但睇過《霜花店》之後，覺得呢套韓國片又真係好出色，劇情豐富再加上演員嘅大膽演出，都已經值回票價。日本嘅《開心直航》或者係《死亡預告》都好ok。香港並唔係無出色嘅導演同演員，但港產片總離不開警匪片、偶像派主演嘅愛情片或者唔係好好笑嘅笑片，而且好多香港明星又跳唔出型像嘅框框，有質素嘅港產片好似越來越少，今時今日真係好難令到人想買飛入場。要數令人回味又或者多talking points嘅港產片，近年可能係《無間道》，甚至乎係十幾年前周星馳嘅笑片。

當然明白電影業嘅苦況，因為有屋企人做電影呢一行，但作為消費者，當然會選擇有質素嘅嘢。不過我相信不單止我，其他人都一樣，有質素嘅港產片，一定會買飛入場支持。

講番《變型金剛狂派再起》，其實只係不過不失。荷里活大片，都唔一定係好嘅。